روم۔ 13 جنوری 2013 ۔۔۔۔ بلونیا کی مشہور و معروف شخصیت ، ہر دلعزیزاورکمونٹی کے ستون چوہدری بشارت وڑائچ آج صبح 4 بجے کے قریب دل کا دورہ پڑنے سے وفات پاگئے ہیں ۔ بشارت وڑائچ کا تعلق سرگودھا سے تھا اور وہ اٹلی میں گزشتہ 22 سال سے آباد تھے ۔ انہوں نے ہمیشہ ایک ہی فیکٹری میں کام کیا تھا اور نیک کمائی سے اپنے دو بیٹے اور بیوی کی دیکھبال کی تھی ۔ چوہدری بشارت وڑائچ گرانارولا میں آباد تھے ، انکی عمر 56 سال تھی  ۔ مرحوم کی نماز جنازہ کل 14 جنوری شام ساڑھے چار بجے سان تورسولا Via Albertiniمیں پڑھائی جائے گی ۔ انکے دونوں بیٹے اور بیوی بلونیا میں آباد ہیں اور انہوں نے کہا ہے کہ پہلی فلائٹ سے میت کو پاکستان روانہ کردیا جائے گا ۔ چوہدری بشارت کے بیٹے جہاں زیب بشارت نے بتایا کہ انہیں کبھی بھی دل کا مسئلہ نہیں ہوا تھا ۔ کل رات انکی طبیعت خراب ہونے پر انہیں ہسپتال پہنچادیا گیا تھا لیکن ڈاکٹروں نے فوری طور پر کہا تھا کہ اب کافی دیر ہوچکی ہے ۔ تصویر میں مرحوم بشارت وڑائچ

روم۔ 11 دسمبر 2012 ۔۔۔۔ اٹلی کے شمال میں واقع فرارا شہر میں پاکستانی کمونٹی سے حکام نے باقاعدہ ملاقات کی ہے ۔ فرارا شہر کے صرف ایک پلازہ یعنی Grattacieloمیں بیشتر پاکستانی آباد ہیں۔  شہر کے کمونے یا ٹاؤن ہال کے نمائندگان نے پاکستانی کمونٹی سے ہفتہ کے روز ملاقات کی ہے ، اس ملاقات میں 80 کے قریب پاکستانی موجود تھے جو کہ پلازہ میں یا پھر اسکے آس پاس آباد ہیں ۔ کمونٹی کی طرف سے لیڈر کے طور پر وحید اکبر نے نمائندگی کی اور حالات حاضرہ پر بحث کی گئی ۔ کمونے کی طرف سے Ivano Guidettiمیٹنگ میں شامل ہوئے ۔ ایوانو کمونے کے سابقہ کونصلر ہونے کے علاوہ اسی پلازہ کے عہدیدار بھی ہیں ۔ سب سے پہلے یہ تہہ کیا گیا کہ پاکستانی کمونٹی کو اٹالین سیکھنی ہوگی کیونکہ اٹالین زبان کی کمی کی وجہ سے ڈائیلاگ بھی نہیں کیا جا سکتا ۔ یہی وجہ ہے کہ اس ملاقات کے لیے ایک پاکستانی ترجمان کو بلانا پڑا ۔ اب جلد اٹالین زبان کا کورس عمل میں لایا جائے گا ۔ اٹالین حکام نے زور دیا کہ پاکستانی کمونٹی اس ملک میں انٹیگریشن یا میل و ملاپ کی طرف توجہ دے ۔ پاکستانی کمونٹی کی طرف سے یہ اپیل کی گئی کہ انہیں کرکٹ کی گراؤنڈ فراہم کی جائے ۔ جوان نسل کرکٹ کھیلنے کے لیے قریبی سکولوں کی گراؤنڈ عارضی طور پر استعمال کرتی ہے ۔ حکام نے کہا کہ وہ کمونے کے اسپورٹس کے کونصلر سے بات چیت کریں گے اور کرکٹ کی باقاعدہ گراؤنڈ کے لیے کوشش کریں گے ۔ یاد رہے کرکٹ پاکستان کا قومی کھیل ہے اور جوان نسل میں بہت مقبول ہے ۔ اسکے بعد انہوں نے کہا کہ ہمیں مسجد کے لیے جگہ فراہم کی جائے کیونکہ انہیں Traversagnoکی مسجد میں جانا پڑتا ہے اور وہاں ہمیں زبان کا مسئلہ پڑتا ہے کیونکہ پاکستانی کمونٹی عربی نہیں بولتی ۔ فرارا کے حکام نے کہا کہ پلازے کے گراؤنڈ فلور پر جگہ موجود ہے جو کہ مسجد کے لیے ادا کی جا سکتی ہے ۔ انٹیگریشن سے متعلق اس میٹنگ کی کامیابی کے  بعد اگلے ہفتے بھی شام 6 بجے کے قریب کمونے کے حکام سے ملاقات کا وقت تہہ کیا گیا ہے ، جس میں مزید گفت و شنید ہو گی اور کموٹی اور کمونے کے درمیان فاصلے کم ہونگے ۔

روم۔ 16 جون 2012 ۔۔۔ تحریر، ایلویو پاسکا ۔۔۔ اٹلی کی سینٹ نے امیگریشن کے کمیشن سے ملاقات کرتے ہوئے یہ بیان دیا ہے کہ 5 لاکھ غیر ملکیوں کو ریگولر کیا جائے  ۔ اٹلی کی تمام تر بڑی سیاسی پارٹیاں اس بات پر متفق ہیں کہ اٹلی میں غیر قانونی کام کیوجہ سے 5 لاکھ غیر ملکی ٹیکس جمع نہیں کرواتے اور کام کے مالکان ان سے غیر قانونی ورک کرواتے ہوئے اٹلی کا نقصان کر رہے ہیں ۔ انہوں نے ایک قانون بناتے ہوئے قومی اسمبلی میں روانہ کر دیا ہے ، جس میں لکھا ہے کہ وہ مالکان جو کہ غیر قانونی تارک وطن کو کام دیتے ہیں ، ان کی سزا میں اضافہ کیا جائے ۔ مثال کے طور پر اگر ایک مالک تین غیر یورپین امیگرنٹس بھرتی کرتا ہے اور ان سے غیر قانونی کام لیتا ہے اور ٹیکس جمع نہیں کرواتا تو اسکی سزا میں اضافہ کیا جائے اور غیر ملکی کو ملک بدر کرنے کی بجائے 6 ماہ کی انسانی ہمدردی کی پرمیسو دی سوجورنو ادا کی جائے ۔ یہ سوجورنو کیس کے دوران جاری کی جائے گی اور اگر کیس کی مدت لمبی ہوئی تو اسے مزید ایک سال کے لیے بڑھایا جا سکے گا اور اگر غیر ملکی اس عرصے کے دوران کام تلاش کرنے میں کامیاب ہو جاتا ہے تو اس سوجورنو کو کام کی پکی سوجورنو میں تبدیل کر دیا جائے گا ۔ وہ مالکان جو کہ کم سن بچے ، جن کی عمر 10 سال سے کم ہے ، اگر ان سے کام لیں گے تو ان کی سزا بھی بڑھا دی جائے گی ۔ ماہرین کا کہنا ہے کہ اس قانون سے 2 ہزار کے قریب غیر ملکیوں کو سوجورنو حاصل ہو سکے گی لیکن یہ ایک اچھا عمل ہے ۔ سینٹ نے قومی اسمبلی اور وزیر اعظم سے کہا ہے کہ اس قانون کو رائج کرنے کے لیے ضروری ہے کہ پہلے اٹلی میں موجود تمام 5 لاکھ غیر ملکیوں کو سوجورنو دی جائے ، بشرطیکہ وہ کام کر رہے ہوں ۔ وہ غیر ملکی جو کہ جرائم پیشہ ہیں یا پھر اٹلی کی سالمیت کے لیے خطرناک ہیں ، انہیں اس قانون میں شامل نہ کیا جائے ۔ ہر غیر ملکی کا مالک اگر یہ بتائے کہ غیر ملکی اسکے پاس کام کررہا ہے اور وہ اس کے تمام تر سابقہ ٹیکس جمع کروائے یا پھر آخری تین مہینوں کے ٹیکس جمع کروائے تو اس مالک کو جرمانے کے بغیر اپنے ملازم کو سوجورنو دلوانے کا حق ہو گا ۔ تمام غیر ملکیوں کے مالک کم سے کم 1000 یورو یا ہزار یورو جمع کرواتے ہوئے ملازم کے لیے سوجورنو لے سکیں گے ۔ اس قانون سے حکومت کے خزانے میں 500 ملین یورو جمع ہونگے اور ہر سال یہ 5 لاکھ غیر ملکی 5 عرب یورو کا ٹیکس جمع کروائیں گے ۔ اٹلی کی مزدور یونین نے کہا کہ امیگریشن کھولتے ہوئے اٹلی میں نئے 5 لاکھ ورکر آئیں گے جو کہ اب غیر قانونی کام کرتے ہوئے حکومت کا نقصان کر رہے ہیں ۔ یاد رہے کہ سینٹ میں پی ڈی ایل، پی ڈی اور تیسری ونگ کی پارٹیوں کے تمام سینٹروں نے اس قانون کی حما‏‏ئت کی ہے ۔ اب اٹلی کے وزیر اعظم مونتی کو امیگریشن کے بارے میں سنجیدگی سے سوچنا ہوگا ۔ یاد رہے کہ اس سے پہلے برلسکونی کی پارٹی پی ڈی ایل امیگریشن کے خلاف تھی کیونکہ اس کا الحاق لیگا نورد کے ساتھ تھا ۔ اب نئے اتحاد بن رہے ہیں اور امیگریشن کے متعلق مثبت سوچ جنم لے رہی ہے ۔ 

روم۔۔۔ تحریر، اعجاز احمد ۔۔۔ اٹلی میں آباد خواتین و حضرات اور پیارے بچوں کو یہ خوشخبری سنائی جاتی ہے کہ آزاد اخبار کی انٹرنیٹ کی سائٹ www.azad.itکا آغاز ہو گیا ہے ۔ اب آپ ایک کلک کرتے ہوئے وہ تمام خبریں اور اٹلی کے امیگریشن کے قوانین اردو میں پڑہ سکتے ہیں جو کہ آپکو آزاد اخبار میں ملتے ہیں ۔ سائنس کی ترقی میں شامل ہونے کے لیے میں نے بھی یہ قدم اٹھایا ہے ۔ تمام تارکین وطن سے اپیل کی جاتی ہے کہ وہ آزاد کی سائٹ کو preferiti  میں رکھ لیں ۔ آزاد اخبار ماہانہ ہے اور چند ایسی خبریں ہوتی ہیں جو کہ فوری طور پر عوام تک پہنچنی لازمی ہوتی ہیں ، اسی خاطر ہم نے سائٹ کا اہتمام کیا ہے ۔ استرانیری ان اطالیہ نے 13 زبانوں میں سائٹیں بنا دی ہیں اور ان میں اب آزاد یعنی اردو کی سائٹ بھی شامل ہو گئی ہے ۔ www.azad.itمیں پاکستان کی خبریں، اٹلی کے امیگریشن کے قوانین، اٹلی کے پاکستانی، اٹلی میں موجود پاکستانیوں کی خوشی، غمی اور جرائم کی خبریں ،اٹلی میں موجود پاکستانی کھلاڑی، کامیاب نوجوان اور پاکستان ایمبیسی کی خبریں شامل ہونگی ۔ وہ لوگ جو کہ آزاد کے لیے اپنی صحافتی خدمات پیش کرنے کے خواہش مند ہوں ، ان سے گزارش ہے کہ وہ مجھ سے رابطہ کریں ۔ آپ کی شکایات، اشتہار، اعلان اور خبریں اس سائٹ میں شائع ہونگی ۔ یاد رہے کہ آزاد اخبار 10 سال سے اٹلی میں موجود پاکستانی کمونٹی کی خدمت کر رہا ہے ۔ گو کہ ہماری صحافت کا انداز اور ہے لیکن پھر بھی ہماری خدمت انتھک ہے ۔ یہ اخبار اٹلی میں ہی بنے گا ، یعنی دوسری سا‏ئٹوں کی طرح اسے پاکستان نہیں روانہ کیا جائے گا اور نہ ہی اسے رسمی اخبار بنایا جائے گا ۔ رسمی اخبارات تمام ایک جیسے ہوتے ہیں اور ایسی صحافت کو اجاگر کرتے ہیں ، جس میں صرف چند مرد حضرات کی تعریفیں، علاقائیت پرستی اور پاکستان پر نظر ہوتی ہے ۔ ایسے اخبار ہمیں ماضی کی طرف گامزن کرتے ہیں اور مستقبل کے خلاف ہوتے ہیں ۔ ہمارا مستقبل اٹلی ہے ، ہمیں اٹلی میں صرف انٹیگریٹ نہیں بلکہ کامیاب بھی ہونا ہے ، یہ ہمارا دوسرا ملک بن چکا ہے ۔ www.azad.itمیں ایک صفحہ اٹالین زبان میں ہو گا ، جس میں ہماری دوسری نسل کے پاکستانی اور اٹالین عوام لکھ اور پڑہ سکیں گے ۔ پاکستان کی ساخت کو مثبت بنانے کے لیے ضروری ہے کہ ہم اٹالین زبان میں بھی قلم میں روانگی پیدا کریں ۔ دوستو ، تمام مشکلات کے باوجود میری کاوش کو فبول کریں، اس کام میں مجھے کوئی بچت نہیں ہوتی اور میری بیوی اکثر مجھ سے لڑتی ہے اور کہتی ہے " تم صحافت کو چھوڑو اور کوئی کام کرو ، اولاد جوان ہو رہی ہے " ۔ شاعر نے کہا تھا

اے قافلے والو میری  ہمت کو  سراہو

ہر چند کہ زخمی تھے قدم ساتھ دیا ہے

Ejaz Ahmad Mob:3476937016.    یہ ای میل پتہ اسپیم بوٹس سے محفوظ کیا جارہا ہے، اسے دیکھنے کیلیے جاوا اسکرپٹ کا فعّال ہونا ضروری ہے