Tuesday, Mar 19th

Last update12:39:09 AM GMT

وسیم اصغر کو فیڈرل کونصلر منتخب کر لیا گیا

روم۔ 28 اکتوبر 2012 ۔۔۔ اٹلی کے شہر ترینتینو میں آباد ہمارے ایک نوجوان پاکستانی وسیم اصغر کو فیڈرل کونصلر منتخب کر لیا گیا ہے ۔ محمد وسیم اصغر کرکٹ کے کھلاڑی ہیں اور Trentino Cricket Clubمیں کھیلتے ہیں ۔ وسیم اصغر نے کہا کہ میں کرکٹ کھیلنے کے ساتھ ساتھ غیر ملکیوں کی انٹیگریشن کے لیے بھی جدوجہد کررہا ہوں ۔ انہوں نے آزاد کو انٹرویو دیتے ہوئے کہا کہ میں اٹلی میں جوان ہوا، یہیں پر تعلیم حاصل کی اور اسکے بعد مجھے یہاں کی یونیورسٹی نے کمپیوٹر ٹیکنالوجی کا ڈپلومہ جاری کیا ، اب میں ترینتو کی یونیورسٹی سے Software Technologiesکا کورس کررہا ہوں ۔ انہوں نے کرکٹ کے بارے میں بات چیت کرتے ہوئے کہا کہ میں نے روویریتوکی گلیوں میں کرکٹ کھیلنی شروع کی اور اسکے بعد اعلی کرکٹ کھیلنے کے لیے کوشاں رہا ۔ میں نے بڑی محنت کی لیکن نتائج دور رہے اور سخت محنت اور ٹریننگ کے بعد میری ٹیم نے 2011 میں اٹلی کی چیمپئن شپ جیت لی اور اسکے بعد 2012 میں بھی ہم نے اٹالین چیمپئن بننے کا اعزاز جاری رکھا ۔ اس دوران مجھے کرکٹ کلب کے اچھے کھلاڑی کے علاوہ کلب کا ایڈمنسٹریٹر مقرر کر دیا گیا ۔ میں کرکٹ کی ٹیم کا انتخاب ، عوامی تعلقات اور کلب کے حساب و کتاب کے لیے اپنی خدمات پیش کرتے ہوئے انتہائی محنت کر رہا ہوں ۔ ہم نے ترینتینو کے سکولوں میں کرکٹ کے کھیل کو متعارف کروایا ہے اور بیشتر سکولوں کے اساتذہ اس کھیل کے بارے میں دلچسپی لے رہے ہیں ۔ ہم چاہتے ہیں کہ کرکٹ صرف ایشین کھلاڑیوں تک محدود نہ رہے اور اس کھیل کو انٹیگریشن کا آلہ استعمال کرتے ہوئے ، اسے قومی کھیل کا اعزاز دیا جائے ۔ وسیم اصغر نے کہا کہ مجھے 27 اکتوبر کے روز بلونیا شہر میں فیڈرل کونصلر منتخب کر لیا گیا ہے ، اب میری کوشش ہوگی کہ میں کرکٹ کو چھوٹے لیول سے نکال کر قومی سطح کے کھیلوں میں شامل کرنے کے لیے اپنی خدمات سرانجام دے سکوں ۔ تصویر میں وسیم اصغر کرکٹ کلب کے صدر Simone Gambinoکے ساتھ ۔ تحریر، اعجاز احمد

Joomla Templates and Joomla Extensions by ZooTemplate.Com