Tuesday, Jan 21st

Last update12:39:09 AM GMT

میلانو میں امیگریشن سنٹر کا قیام

روم۔ 18 فروری 2013 ۔۔۔۔ اٹلی کے شمالی شہر میلانو میں امیگریشن سنٹر کا قیام کیا جا رہا ہے ۔ میلانو کے میئر پیزاپیا نے اعلان کیا ہے کہ اس شہر میں غیر ملکیوں کی سہولت اور انٹیگریشن کے لیے ایک خاص قسم کا سنٹر بنایا جائے گا ۔ اس سنٹر کا نام Immigration Centerرکھا گیا ہے اور اس پر ستمبر میں کام شروع ہو جائے گا ۔ امید کی جاتی ہے کہ اسے 2015 سے قبل مکمل کرلیا جائے گا ۔ اس سنٹر میں غیر ملکیوں کے تمام تر شہر کے دفاتر منتقل کردیے جائیں گے اور اسکے بعد ایک غیر ملکی شہر کے چکر لگانے کی بجائے ایک ہی جگہ سے تمام تر کام کروالے گا ۔ اس سنٹر میں صحت، امیگریشن، تھانہ اور دوسرے دفاتر منتقل کیے جائیں گے ، اس سلسلے میں میلانو کے پریفی تورا، آزل اور تھانے کے حکام سے بات چیت کرلی گئی ہے ۔ امیگریشن سنٹر میں غیر ملکی کو وہ تمام تر معلومات دی جائیں گی جن کی اسے ضرورت ہوتی ہے ۔ اس کے علاوہ دوسرے ممالک سے روانہ ہونے والے غیر ملکی ، میلانو میں نئے آنے والے غیر ملکی اور کچھ عرصہ تک رہنے والے غیر ملکی اس سروس سے مستفید ہو سکیں گے ۔ ان غیر ملکیوں کو شہر کی انٹیگریشن کی بنیادی خصوصیات ،یعنی صحت کا دفتر، پولیس کا دفتر، تعلیم کا دفتر ، چیمبر آف کامرس کا دفتر اور دوسرے تمام دفاتر سے روشناس کروایا جائے گا جو کہ اس کے لیے اہم ہونگے ۔ امیگریشن سنٹر کے زریعے انٹرکلچرل پراجیکٹ ، امتیازی سلوک اور ویلفئر کے پراجیکٹ بھی عمل میں آئیں گے ۔ میئر نے کہا کہ شہر کے مختلف علاقوں میں پھیلے ہوئے امیگریشن سے متعلق دفاتر غیر ملکی کے لیے مسائل کھڑے کرتے ہیں اور اس کا وقت برباد کرتے ہیں ۔ ایک ہی جگہ پر امیگریشن سنٹربنانے سے کافی مسائل حل ہو جائیں گے ۔ اسی دفتر میں ایک کانفرنس ہال عمل میں آئے گا ، جہاں تمام دفاتر آپس میں میٹنگ کرتے ہوئے اس سروس کو مزید مضبوط بنائیں گے ۔ امیگریشن سنٹر کی انٹرنیٹ کی سائٹ بھی ہو گی ، جس سے اس شہر کے تمام غیر ملکی اور اٹالین شہریوں کو اس سروس کے بارے میں بتایا جائے گا ، اس سائٹ کا نام portale dell’integrazioneہو گا ۔

 

Joomla Templates and Joomla Extensions by ZooTemplate.Com